سوبر مان كرة القدم السورية

خسرنا مباراة الذهاب أمام المنتخب الإيراني بارضه 2 / 0 ... وصار لازم بالإياب نفوز على ارضنا 3 / 0 حتى نتأهل لكأس العالم ...

الصحف الإيرانية اعلنت الأفراح والليالي الملاح .. وجماهيرهم نزلت تغني وترقص بالشواارع ..

وصحفنا ورغم اعترافها بقوة المنتخب الإيراني ونجومه الكبار وبأنه منتخبهم طول عمره عقدتنا .. كتبت لا مستحيل في عالم كرة القدم ..

والكردغلي والمحروس قالوا لحنا بحاجة لمعجزة ورغم هيك لح نعمل اللي علينا ..

كنت عم تابع وقول لازم نتأهل لكأس العالم .. لازم نصير بين الفرق الكبيرة والكل يسمع باسم سوريا ويشوف علمها فوق بالعالي ..

حملت حالي ورحت على ملعب العباسيين بدي شوف المحروس والكردغلي .. على الباب قالولي التمرين سري ممنوع يفوت حدا..

 شرحتلهم انها مهمة وطنية وضروري تخبروا المحروس أنه أبو عدنان بده يشوفك .. بعد شوي قالولي تفضل ..

أخدت المحروس والكردغلي على جنب وقلتلهم انا بضمنلكم الفوز بس خلوني العب ...

المحروس بقلي شو عم تحكي عمرك 45 سنة وبدك تلعب  مستحيل شو شايفني مجنون ولا بدك تضحك عليي .. حل عنا خلينا نعرف نشتغل ..

 قلتله صفولي 10 طابات على خط نص الملعب واذا  طابة منهم صدها الحارس لا تقبلوني .. الكل صار يضحك وسايروني ليغيروا جوا ..

كل الطابات فاتت بالكول والحارس ماقدر يصد ولا طابة !!! اقتنعوا فيني وقالوا لازم تكون مشاركتي سرية وبآخر 10 دقايق بالمباراة ..

 وسربوا للصحف اصابة لاعبين وانهم اضطروا يجيبوا لاعب قديم كبير بالعمر ممكن ينفع الفريق وانه أحوال الفريق صارت كتير سيئة ..

تركت الدخان وصرت اتمرن تمارين لياقة قاسية كتير متل تمارين الأبطال ... اطلع جبال واحمل اثقال والعرق يكت مني ..

واجا اليوم .. ودقت ساعة الصفر ... الملعب ملياان لآخره والمصوريين بيطلعوا 300 وكل المحطات ناقلة المباراة ..

وبلشت اللعبة فريقنا ماعم يهاجم وعم يلعب ببطئ والايرانيين شو بدهم احسن من هيك .. خلص الشوط الأول صفرين .. شوط بملل بقرف ,,

وبلش الشوط التاني نفس الشي وبعد ربع ساعة بقلي المحرووس قوم حمي .. وقمت وبلشت حمي والجمهور يصررخ مو ناقص غير الختياار ..

 والايرانيين يطلعوا فيني ويضحكواا .. ووقت صار وقتي نزلت ..  كانت الخطة بس انه لعيبتنا يتركولي كم متر لشووط من نص الملعب ..

 استلمت الطابة  من الدائرة وشطتها  ماشافها حارسهم غير بالكول .. الكل صار ينط ويصرخ ابو عدناان .. ابو عدناان ..

 دقيقتين بيعطوني الطابة نفس الشي شوووطة من نص الملعب بتجي بالتمانة .. الكل بيركض عليي وبصيرواا يحملووني ويزتووني بالعالي ..

 الإيرانيين انتبهواا بيبعتواا تنين يمسكووني ومابقى تجيني طابة .. والوقت بلش يمر وصاروا يهاجمونا ..

المحروس بنادي فراس وجهاد بقلهم بتحاورواا بدي فاول ولو بملعبنا .... وبآخر ربع دقيقة بالوقت الضايع بياخد فراس فاول ..

بس بعيد بنص ملعبنا لحنا  .. بحط الطابة والإيرانيين بيعملواا حاجز قدامي من 4 لعيبة ... الملعب ساكت مو بس الملعب ساكت ..

 حسيت كل سوريا ساكته .. والقلوب عم تررجف .. برركض وبقول: يارب نصررك وبشوووط ..الطابة بتطلع متل لمعة بررق .. متل نيززك ..

بتضرب بالعارضة وبتفووت الكول .. ومنتأهل لكأس العالم وبصير بطل وطني ..

لهون خلص الحلم .. بقدر كماان أحلم كيف احمل كأس العالم .. وكيف اربح مارادونا وبلاتيني ...
 

الكاتب:ابو عدنان بكري